#ऐ_खुर्द_पटाक# :-हेमांशु_मिश्रा
ऐ खुर्द पटाक,
ऐ खरण खरण।
लम्बीयाँ मेंखा
धरत चिरदियाँ ,
ड्रिल मशीनां
रौला करण,
घुरलू घूमे
घरण घरण,
ऐ खुर्द पटाक,
ऐ खरण खरण।
जिमिया फाड़ी
गरारी फ़साई,
सौ डिड सौ फीट
चीरी चुकाई
पाणी निकलिया
परण परण।
ऐ खुर्द पटाक,
ऐ खरण खरण।
लोको सोचा,
कितनियाँ बरसातां
बरियाँ होंगियाँ
जिमिया च पाणी
रचने जो,
पत्थरां विच बसने जो,
कितनी सदियाँ
लगियाँ होंगियाँ,
भूजल भंडार
भरने जो,
कजो मुकाणा
जिमिया दा पानी
बोर लगाई
बरण बरण,
ऐ खुर्द पटाक,
ऐ खरण खरण,
छीलना लग्यो,
पुटना लग्यो,
धरती माता जो
खुंणणा लग्यो
कजो सारे
झरुडू बॉडी
अजकल दिखा
सुखणा लग्यो,
पुराणी सीरां
हिलाणा लग्यो,
करन ट्यूब वेल
टरण टरण
ऐ खुर्द पटाक,
ऐ खरण खरण,
ग्रांएँ ग्राएँ,
शहरे शहरे,
अणमुक बोरवेल,
खोदी चुकाए
नोए लगाए
दबी ने चलाये,
रिचार्ज पाणी करणा नी,
मता मता पाणी
काढणा लाये,
ठेकदारे दी जेबां
कजो सारे ही
भरणा लाये
पलम जो चंगर
बनणा लाये
पलम नी बचणी
चरण चरण
ऐ खुर्द पटाक,
ऐ खरण खरण।
सौ साले दा सोचा अड़यो
सीधा सुचा कम
करयो मड़यो
पाणी अज
मुकाया ता
जीणा कियाँ
सोची लेया
बच्चेयाँ दे
बच्चेयाँ दा ता
अगला पिछला
सोची लिया,
मने ते सोचा
मनण मनण
ऐ खुर्द पटाक,
ऐ खरण खरण।
